CENTRAL COMMISSION FOR HOLDING ELECTIONS AND REFERENDUMS IN TURKMENISTAN
Türkmen tebigatyny joşa getirip, ony läle-reýhana büräp, beýik ýaşaýşa ynamdyr ylham paýlap, ynsan balasynyň nepesini, tutuş durkuny durlap, kükreýip gelýän ajaýyp bahar paslynda geçiriljek saýlawlar tutuş türkmen jemgyýetiniň içki sazlaşygynyň, agzybirliginiň, jebisliginiň, kämilliginiň, işjeňliginiň täze derejelere göterilmegini üpjün edip biljek giň mümkinçilikleriň binýatlyk esaslaryny döreder. Türkmenistanyň Mejlisiniň deputatlarynyň, welaýat, etrap, şäher halk maslahatlarynyň we Geňeşleriň agzalarynyň Türkmenistanyň Konstitusiýasyna, Türkmenistanyň Saýlaw kodeksine, şol bir wagtyň özünde-de osen dünýäniň umumy ykrar edilen talaplaryna laýyklykda geçiriljek bu saýlawlaryň haýyrly boljakdygyna tüýs ýürekden ynanýarys.
Häzirki wagtda ýurdumyzda Türkmenistanyň Mejlisiniň deputatlarynyň saýlawlary boýunça 125 saýlaw okrugy döredildi. Welaýat, Aşgabat şäher halk maslahatlarynyň agzalarynyň saýlawlary boýunça 240, etrap şäher halk maslahatlarynyň agzalarynyň saýlawlary boýunça 1200, şeýle hem Geňeş agzalarynyň saýlawlary boýunça 5900 saýlaw okrugy döredildi.
Tutuş ýurdumyz boýunça saýlaw uçastoklarynyň 2602-si, şol sanda Türkmenistanyň daşary ýurtlardaky diplomatik wekilhanalarynyň, konsullyk edaralarynyň ýanynda hem 39-sy döredildi.
Gysga döwrüň içinde şeýle giň möçberli guramaçylyk işleriniň ýaýbaňlandyrylmagy Türkmenistan döwletimizde saýlaw ulgamynyň işiniň ösen dünýäniň talaplaryna laýyk ýola goýlandygyndan, halkara ölçeglerine doly kybap gelýändiginden habar berýär.
Il içinde uly abraýa eýe kişileri saýlamak pähimine gulak asmagy özüne mertebe saýýan türkmen raýatlary şu günler mynasyp dalaşgärleri hödürlemegi işjeň dowam etdirýärler.
Türkmen akyldary Mahmyt Zamahşary «Ýagşyzadalaryň bahary» atly eserinde «Ýagşy niýet edilmeli işiň deň ýarysydyr» diýip ýazypdyr. Syýasy köpdürliligiň mäkäm kök uran mekany bolan jebis türkmen jemgyýetinde elmydama bolşy ýaly, il-günümiz saýlawlara barýarka-da, kalbyny ýagşy niýet-pällerden dolduryp, hoş işleri nazarlaýar!
Şeýle ýagdaýda: “Bahar saýlawlaryňyz haýyrly bolsun, watandaşlar!” diýäýmek galýar!
MERKEZI SAÝLAW TOPARY.