CENTRAL COMMISSION FOR HOLDING ELECTIONS AND REFERENDUMS IN TURKMENISTAN
Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň saýasynda eziz Diýarymyzyň her bir güni toýdur baýramlara, taryhy wakalara beslenýär. Üstünliklere beslenip gelýän ýyllarymyz ýene bir üstünlikli, rowaç ýyl bilen baýlaşýar. Merdana halkymyz täze taryhy eýýamyň şöhratly işlerini dowamata atarjak täze, 2025-nji ýyly şatlyk we dabara bilen garşylady. «Pähim-paýhas ummany Magtymguly Pyragy» şygary astynda geçen 2024-nji ýyly bolsa ýokary ruhubelentlik bilen jemledi.
«Ösüş biziň alyp barýan syýasatymyzyň baş maksadydyr» diýýän hormatly Prezidentimiziň parasatly ýolbaşçylygynda ösüşli, ýeňişli menzilleri ynamly külterleýän türkmen halky «Halkara parahatçylyk we ynanyşmak ýyly» diýlip atlandyrylan ýyla-da belent ruh bilen gadam basdy. Ak arzuwlar, beýik maksatlar bilen garşy alnan bu ýyl hem agzybir halkymyz, eziz Diýarymyz üçin täze üstünlikleriň ýyly bolar.
Müçe hasaby boýunça 2025-nji ýyl ýylan ýylydyr. Ýylan ýyly ynsan durmuşyna paýhas we deňagramlylyk getirýär. Üstünlik gazanmagyň esasy şertleri tejribäňi artdyrmak we açyklyk bolar.
Hormatly Prezidentimiz abraýly halkara guramalary bilen hyzmatdaşlyk etmegiň döwletimiziň halkara syýasatynyň strategik ugurlarynyň biridigini, mundan beýläk-de şeýle boljakdygyny belleýär.
Ýeri gelende bellesek, saýlaw ulgamynda hem Birleşen Milletler Guramasy (BMG), Ýewropada Howpsuzlyk we Hyzmatdaşlyk Guramasy (ÝHHG), Garaşsyz Döwletleriň Arkalaşygy (GDA), başga-da ençeme halkara guramalary bilen köpugurly gatnaşyklary ösdürmäge aýratyn ähmiýet berilýär. Şol halkara gatnaşyklarynyň çäklerinde, Türkmenistanyň hormatly Prezidentiniň saýlawlary guramak we geçirmek boýunça dünýä tejribelerini öwrenmek baradaky nesihatlaryna we tabşyryklaryna laýyklykda, 2024-nji ýylyň dowamynda Türkmenistanda Saýlawlary we sala salşyklary geçirmek boýunça merkezi toparyň wekilleri Ýewropada Howpsuzlyk we Hyzmatdaşlyk Guramasynyň Aşgabatdaky merkeziniň we Birleşen Milletler Guramasynyň Ösüş maksatnamasynyň Türkmenistandaky wekilhanasynyň guramagynda geçirilen okuw maslahatlaryna, şeýle-de, Garaşsyz Döwletleriň Arkalaşygynyň çäklerinde geçirilen Prezident we Parlament saýlawlaryna hem-de forumlara gatnaşdylar.
Dünýä giňişliginde adamzadyň ýagşy umytlar, nurana arzuwlar bilen söýüp garşylan Täze ýyl baýramy ýurdumyzyň dürli künjeklerinde bagtyýar maşgalalaryň bereketli ojaklarynda agzybirligiň, bagtyýarlygyň aýdyň nyşanyna öwrülip, şatlyk-şowhuna beslendi.
Täze ýyl baýramy ýurdumyzyň şäherlerinde, şäherçelerinde, obalarynda giňden we dabaraly bellenilýär. Paýtagtymyzyň köp sanly ýaşaýjylaryny hem-de myhmanlaryny bir ýere jemlän, täze ýyl baýramynyň esasy wakalarynyň geçýän ýeri bolan «Älem» medeni-dynç alyş merkeziniň öňündäki Ýalkym saçýan Baş arçanyň beýikligi 44 metre, ini bolsa 16 metre deň bolup meýdançanyň bezegi hemmeleriň göwnüni galkyndyrdy.
Ýurdumyzda Täze ýyl baýramçylygyny şatlyk-şowhun bilen geçirmek üçin uly işler alnyp baryldy. Köpetdagyň etegindäki binalaryň bir bitewi sazlaşygy bu ýerde guralan dabaralara özboluşly öwüşgin çaýdy. Garaşsyz Watanymyzyň paýtagtynyň bu täsin künjeginde häzirki döwrüň depginli ösüşi aýdyň duýulýar.
Bezelen arça, joşgunly aýdym-sazlar, ýaşlaryň şadyýan sesi bu baýramyň özboluşlylygyny artdyrdy. Hormatly Prezidentimiz – Arkadagly Gahryman Serdarymyz çagalara bolan mähirli garaýşyň ajaýyp nusgasyny görkezip, ýurdumyzyň Baş arçasynyň ýanyndaky dabaralara gatnaşdy hem-de ýaş türkmenistanlylary täze ýyl baýramçylygy bilen gutlady.
Dabara gatnaşan çagalara Täze ýyl sowgatlary gowşuryldy. Arkadagly Gahryman Serdarymyz çagalaryň haýyşy boýunça olar bilen bilelikde bu günki şatlykly wakadan ýadygärlik hökmünde ýurdumyzyň Baş arçasynyň ýanynda surata düşdi.
Bu ajaýyp baýram maşgala baýramçylygydyr.
Goý, täze ýylyň her bir güni bagtyýar pursatlara beslensin. Durmuş size elmydama garaşylmadyk şatlykly günleri bagyş etsin!
Merdan Halbaýew,
Türkmenistanda Saýlawlary we sala salşyklary geçirmek boýunça merkezi toparyň edarasynyň Guramaçylyk müdirliginiň baş hünärmeni.