TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR

Birleşen Milletler Guramasynyň Baş sekretary Antoniu Guterrişden Türkmenistanyň Prezidenti Serdar Berdimuhamedowyň adyna hat gelip gowuşdy. Beýan edilişi ýaly, Antoniu Guterriş hatynda şu ýylyň 5 – 8-nji awgusty aralygynda Awazada Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatyny geçirmek başlangyjy üçin Türkmenistanyň Prezidentine şeýle hoşallyk bildirýär, ýagny:

— Ýurduňyzyň parahatçylyk we köptaraplaýyn dialog ýörelgelerine ozaldan gelýän ygrarlylygy maslahaty geçirmek üçin oňyn esas döretdi. Dünýäniň çar künjeginden gatnaşyjylary, şol sanda döwlet we hökümet Baştutanlaryny, raýat jemgyýetini, ýaşlaryň we köpçülikleýin habar beriş serişdeleriniň wekillerini umumy gün tertibiniň daşyna birleşdirmek boýunça eden tagallalaryňyza ýokary baha berýärin.

Bu çäre deňze çykalgasy bolmadyk ösüp barýan döwletlere durnukly we inklýuziw ösüşi gazanmaga mümkinçilik bermek üçin milli hereketleri, sebit hyzmatdaşlygyny we ählumumy syýasy çäkleri özara ylalaşmakda möhüm orun eýeledi.

Awaza syýasy Jarnamasy hem-de Hereketleriň Awaza maksatnamasy Geljegiň bähbidine pakt hem-de Durnukly ösüş babatda 2030-njy ýyla çenli döwür üçin Gün tertibi bilen baglanyşykly bolup, geljek on ýyl üçin hereketleriň meýilnamasydyr. Bu borçnamalar söwda amallaryny ýeňilleşdirmäge, düzümleýin özgertmelere, ulag arabaglanyşygyna, tehnologiýalara, howanyň üýtgemegine durnuklylygy pugtalandyrmaga we halkara goldawyny herekete getirmäge aýratyn ähmiýet bermek bilen, Durnukly ösüş maksatlaryny gazanmak işini çaltlandyrar – diýip, BMG-niň Baş sekretary öz hatynda belleýär.

Antoniu Guterriş şeýle hem özüne we BMG-niň wekiliýetine bildirilen myhmansöýerlik üçin Türkmenistanyň Prezidentine hem-de halkyna çuňňur hoşallygyny şeýle beýan edýär, ýagny:

— Hereketleriň Awaza maksatnamasyny doly we netijeli durmuşa geçirmek işinde Siziň bilen ýakyndan hyzmatdaşlyk etmek mümkinçiligine sabyrsyzlyk bilen garaşýaryn – diýip, BMG-niň Baş sekretary Türkmenistanyň Prezidentine ýollan hatynda nygtaýar.