TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR
Parahatçylyk we ynanyşmak ýoly bilen ynamly ösüp barýan Türkmenistanyň dünýä giňişliginde özboluşly daşary syýasaty amala aşyrýan döwlet hökmünde özüni tanadandygyny, bu babatda bitiren hyzmatlary bilen halkara abraýynyň has-da belende göterilendigini uly buýsanç bilen aýtmak gerek.
Hormatly Prezidentimiziň başlyklyk etmeginde Garaşsyz, hemişelik Türkmenistanda 2025-nji ýylyň 5–8-nji awgusty aralygynda geçirilen umumadamzat bähbitli halkara forum munuň şeýlediginiň nobatdaky subutnamasy boldy. Deňze çykalgasy bolmadyk ösüp barýan döwletler jemi 32 ýurdy, 570 million ilaty öz içine alýar.
Maslahatyň çäreleri 3-nji awgustda, dost-doganlygyň mekany bolan «Awaza» milli syýahatçylyk zolagynda Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň başlanmagy mynasybetli baýdak galdyrmak dabarasy bilen badalga aldy.
Awazada halkara forum bilen utgaşyklylykda 4-nji awgustda geçirilen Merkezi Aziýa döwletleriniň Baştutanlarynyň ýedinji Konsultatiw duşuşygyna taýýarlyk görmek bilen bagly çäraniň çäklerinde Özbegistanyň Prezidenti Şawkat Mirziýoýewiň Türkmenistanyň «Hyzmatdaşlygy ösdürmäge goşandy üçin» ordeni bilen sylaglanylmagy esasy syýasy wakalaryň biri boldy.
Dünýäniň nazaryny Türkmenistanda jemlän, bütin dünýä üçin ähmiýetli bolan bu wajyp çärä – BMG-niň Deňze çykalgasy bolmadyk ösüp barýan döwletler boýunça üçünji maslahatyna BMG-niň Baş sekretary Antoniu Guterrişiň, dostlukly döwletleriň Prezidentleriniň, wise-prezidentleriniň, ýolbaşçy düzümleriniň wekilleriniň gatnaşmagy maslahatyň möhümdigini äşgär etdi.
Hazaryň türkmen kenarynda geçirilen maslahat deňiz mümkinçilikleriniň oňyn çözülmeginde, sebit integrasiýasynyň çuňlaşdyrylmagynda uly ähmiýete eýe bolup, halkara gatnaşyklarynyň ählumumy ösüşiniň işjeňleşmegine uly täsir etdi hem-de bu babatda täze sahypany açdy we onuň berk binýadyny döretdi.
Türkmen halkynyň Milli Lideriniň we hormatly Prezidentimiziň plenar mejlisler görnüşinde dowam eden forumyň çäklerindäki taryhy çykyşlarynyň hem-de ýokary wezipeli wekiller bilen geçiren özara duşuşyklarynyň hyzmatdaşlyk arkaly ösüşe ýardam bermek atly maslahatyň esasy maksadyny we mazmunyny açyp görkezýän çuň mana eýedigini buýsanç bilen bellemek zerur.
Maslahata gatnaşmaga gelen myhmanlaryň çykyşlary, maslahat bilen utgaşyklylykda geçirilen Parlament forumy, raýat jemgyýetiniň forumy, ýaşlar forumy, zenan ýolbaşçylaryň duşuşygy, hususy forum, günorta-günorta hyzmatdaşlygy boýunça ministrler duşuşygy, ugurdaş düzümleriň ikitaraplaýyn duşuşyklary, tegelek stollar, metbugat maslahatlary, brifingler we beýleki ugurdaş çäreler hem tejribe alyşmakda, taslamalary durmuşa geçirmekde ähmiýetlilik we işjeňlik häsiýetine eýe boldy.
Dünýä diplomatiýasynyň merkezine öwrülen demokratik ýurdumyzyň täze taryhy eýýamynyň möhüm wakasy bolan halkara maslahatyň çäklerinde medeni maksatnamanyň hem kabul edilmegi, ýagny halklary dostlaşdyrýan medeni çäreleriň – sergileriň, medeniýet-sungat ussatlarynyň konsertleriniň geçirilmegi forumyň many-mazmun taýdan baýlaşmagyna, medeni diplomatiýanyň ösdürilmegine, täsirli we ýatda galyjy wakalara beslenmegine, türkmen halkynyň dünýä nusgalyk myhmansöýerliginiň dabaralanmagyna giň şert döretdi.
Halkara parahatçylyk we ynanyşmak ýylynda Hazaryň merjen kenary «Awaza» milli syýahatçylyk zolagynda geçirilen parahatçylykly we durnukly ösüşiň halkara maslahatynyň ýurdumyzyň hoşniýetli halkara gatnaşyklarynyň dabaralanmasy bolandygyny buýsanç bilen bellemek gerek. Çünki, ýurdumyza gelen myhmanlar bu möhüm çäräniň ýokary guramaçylyk derejesinde geçirilendigini hem-de ykdysady mümkinçilikleri giňeltmekde umumadamzat ähmiýetlidigini kanagatlanma bilen nygtadylar.
Türkmenistanyň hemişelik Bitaraplygynyň şanly 30 ýyllygyna hem-de Birleşen Milletler Guramasynyň esaslandyrylmagynyň 80 ýyllygyna beslenýän şu ýylda şeýle ýokary wekilçilikli forumyň ýurdumyzda geçirilmegi möhüm ähmiýete eýedir. Munuň özi ýurdumyzyň ählumumy abadançylygy, howpsuzlygy üpjün etmegiň bähbidine netijeli gatnaşyklary pugtalandyrmak, durnukly energetika, ulag-logistika, ekologiýa, daşky gurşawy goramak ýaly ulgamlarda hyzmatdaşlygy işjeňleşdirmek boýunça öňe sürýän başlangyçlarynyň dünýä jemgyýetçiligi tarapyndan giňden goldanylýandygynyň we ykrar edilýändiginiň aýdyň beýanydyr.
Şeýlelik bilen, medeni-ynsanperwer, ösüş we ekologiýa ugurlaryny öz içine alýan, geljekki on ýylyň dowamynda «Awaza» maksatnamasy boýunça hyzmatdaşlygy nazarlaýan bu halkara maslahat we onuň çäklerinde guralan wajyp çäreler hoşniýetlilik syýasatyny öňe sürýän, ykdysady taýdan ösen, syýasy taýdan durnukly Türkmenistanyň dünýä bileleşigi hem-de dostlukly döwletler bilen hoşniýetli hyzmatdaşlygynyň ösdürilýändiginiň, bar bolan gatnaşyklarynyň bolsa täze derejelere çykarylýandygynyň aýdyň subutnamasyna öwrüldi.
Amangeldi Gandymow,
Türkmenistanda Saýlawlary we sala salşyklary geçirmek boýunça merkezi toparyň başlygynyň orunbasary.