TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR
Halkara parahatçylyk we ynanyşmak ýylynda umumadamzat ähmiýetli çäreleri durmuşa geçirýän we ynamly ösüp barýan döwletimiziň halkara derejesindäki abraý-mertebesiniň has-da belende göterilendigini uly buýsanç bilen aýtmak gerek. Elbetde, 2025-nji ýylyň 22-nji awgustynda «Awaza» milli syýahatçylyk zolagynda geçirilen «Türkmenistan – Azerbaýjan – Özbegistan» formatyndaky üçtaraplaýyn sammit hem munuň şeýledigini äşgär etdi. Dogrusy, indi Hazar deňziniň ekologiýa taýdan arassa türkmen kenarynda il-ýurt, dünýä bähbitli dürli halkara çärelerini geçirmek biziň döwletlilik ýörelgämizden ugur alýan asylly däbe öwrüldi.
Şol asylly däbe görä, Gojaman Hazaryň merjen kenarynda geçirilen bu möhüm ähmiýetli halkara sammite Azerbaýjan Respublikasynyň Prezidenti Ilham Aliýew we Özbegistan Respublikasynyň Prezidenti Şawkat Mirziýoýew gatnaşdylar. Şu ýylyň 22-nji awgustynda Azerbaýjan we Özbegistan Respublikalarynyň döwlet baştutanlary Türkmenbaşynyň halkara howa menzilinde mähirli we dabaraly ýagdaýda garşy alyndy.
22-nji awgustda Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Azerbaýjan Respublikasynyň Prezidenti Ilham Aliýewiň arasynda, şeýle-de Gahryman Arkadagymyz bilen Özbegistan Respublikasynyň Prezidenti Şawkat Mirziýoýewiň arasynda duşuşyk geçirildi. Ikitaraplaýyn we resmi wekiliýetleriň gatnaşmagynda giňişleýin düzümde geçirilen duşuşyklaryň dowamynda türkmen-azerbaýjan, şeýle-de türkmen-özbek gatnaşyklarynyň ulgamlaýyn we yzygider häsiýete eýe bolýandygy nygtaldy.
Awazanyň döwrebap Kongresler merkezinde geçirilen «Türkmenistan – Azerbaýjan – Özbegistan» formatyndaky üçtaraplaýyn sammit ýurdumyzyň dünýäniň dürli sebitleri, şol sanda ýakyn goňşy döwletler bilen ysnyşykly syýasy, ykdysady, medeni-ynsanperwer halkara hyzmatdaşlygynyň barha ösýändiginiň we berkeýändiginiň, hil taýdan täze derejelere çykýandygynyň giňden dabaralanmasy boldy.
Elbetde, halkara hyzmatdaşlygynyň täze taryhy eýýamynyň möhüm sahypasyny ýazan Türkmenistanyň, Azerbaýjan Respublikasynyň, Özbegistan Respublikasynyň ýokary derejedäki duşuşygynyň halkara derejesinde parahatçylygy we dürli ugurlar boýunça durnukly ösüşi üpjün etmekde, bu babatda oňyn netijeleri gazanmakda örän uly ähmiýete eýe bolandygyny hem aýratyn belläp geçmek gerek.
Türkmenistanyň, Azerbaýjan Respublikasynyň we Özbegistan Respublikasynyň ýokary derejeli üçtaraplaýyn duşuşygy tamamlanandan soňra, resminamalara gol çekmek dabarasy boldy. Gol çekişilen Ähtnamalar, Teswirnamalar we Ylalaşyklar geljekki hyzmatdaşlyklaryň ugurlaryny kesgitledi. Ýokary derejeli duşuşygyň jemleri boýunça türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow, Azerbaýjan Respublikasynyň Prezidenti Ilham Aliýew hem-de Özbegistan Respublikasynyň Prezidenti Şawkat Mirziýoýew Türkmenistanyň, Azerbaýjan Respublikasynyň we Özbegistan Respublikasynyň Bilelikdäki Beýannamasyny kabul etdiler.
Resminamalara gol çekmek dabarasy tamamlanandan soňra, duşuşygyň jemleri boýunça türkmen halkynyň Milli Lideri Gahryman Arkadagymyz, Azerbaýjan Respublikasynyň Prezidenti we Özbegistan Respublikasynyň Prezidenti metbugat wekillerine ýüzlenme bilen çykyş etdiler.
Türkmen halkynyň Milli Lideri, Türkmenistanyň Halk Maslahatynyň Başlygynyň ýokary derejeli Türkmenistan — Azerbaýjan — Özbegistan duşuşygynyň netijeleri boýunça metbugat wekillerine ýüzlenmesi aýratyn many-mazmuna eýe boldy. Gahryman Arkadagymyz öz ýüzlenmesinde «Ýokary derejedäki duşuşygyň dowamynda üç doganlyk ýurduň halklarynyň arasyndaky giň gerimli ynsanperwer gatnaşyklary mundan beýläk-de ösdürmek boýunça amatly şertleri döretmek babatda ylalaşyk gazanyldy. Elbetde, bu hyzmatdaşlyk ylym, bilim, saglygy goraýyş, sport, medeniýet, sungat, hususan-da, aýdym-saz, halyçylyk, atşynaslyk ýaly beýleki köp sanly ynsanperwer ugurlary öz içine alýar» diýip nygtady.
Azerbaýjan Respublikasynyň Prezidenti we Özbegistan Respublikasynyň Prezidenti hem öz ýüzlenmesinde bu üçtaraplaýyn duşuşygyň sebitde halkara gatnaşyklaryny ösdürmekde uly ähmiýete eýedigini kanagatlanma bilen nygtadylar.
Metbugat maslahaty tamamlanandan soňra, Gahryman Arkadagymyz, Azerbaýjan Respublikasynyň we Özbegistan Respublikasynyň Prezidentleri bilelikde ýokary derejedäki üçtaraplaýyn duşuşyk mynasybetli meýilleşdirilen medeni çäreleriň geçirilýän ýerine bardylar we «Galkynyş» milli at üstündäki oýunlar toparynyň çykyşlaryna höwes bilen tomaşa etdiler. Ýokary derejedäki duşuşyga gatnaşandyklary, geçirilen gepleşikleriň jemleri boýunça oňyn çözgütleriň kabul edilendigi we ylalaşyklaryň gazanylmagyna goldaw berendikleri üçin, türkmen tarapynyň çuňňur hoşallygynyň nyşany hökmünde Azerbaýjan Respublikasynyň Prezidenti Ilham Aliýewe hormatly Prezidentimiziň, Milli Liderimiziň we tutuş türkmen halkynyň adyndan Tawus atly ajaýyp ahalteke bedewiniň sowgat berilmegi, soňra Özbegistan Respublikasynyň Prezidenti Şawkat Mirziýoýewe hormatly Prezidentimiziň, Gahryman Arkadagymyzyň we türkmen halkynyň adyndan köşekli arwana düýäniň sowgat berilmegi medeni çäreleriň esasy wakasynyň biri boldy.
Doganlyk döwletleriň Liderleri gowşurylan bu sowgatlary öz ýurtlaryna we halklaryna bildirilen çuňňur hormatyň nyşany hökmünde kabul edýändiklerini nygtap, munuň üçin Gahryman Arkadagymyza hem-de hormatly Prezidentimize, tutuş türkmen halkyna tüýs ýürekden hoşallyklaryny beýan etdiler.
Şeýle hem bu ýerde türkmen toý-baýramlaryna mahsus dabaralar guraldy. Ak öýleriň öňünde milli tagamlar taýýarlanyldy. Amaly-haşam sungatynyň eserleriniň sergisi dabaralara aýratyn öwüşgin çaýdy.
Umuman, üçtaraplaýyn sammit Türkmenistan – Azerbaýjan – Özbegistan dost-doganlyk gatnaşyklarynyň dabaralanmasy bolup, halkara gatnaşyklarynda täze taryhy sahypany açdy.
Amangeldi Gandymow,
Türkmenistanda Saýlawlary we sala salşyklary geçirmek boýunça merkezi toparyň başlygynyň orunbasary.