TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR
Bilşimiz ýaly, her ýylyň 1-nji sentýabrynda Türkmenistanda Bilimler we talyp ýaşlar güni dabaraly ýagdaýda bellenilip geçilýär. Bilim ojaklarynda kakylýan we göwnüňi galkyndyrýan ilkinji jaňlar bolsa täze okuw ýylynyň başlanýandygyny buşlaýar.
Bilimler we talyp ýaşlar güni mynasybetli, hormatly Prezidentimiz Serdar Berdimuhamedowyň Garaşsyz, baky Bitarap Türkmenistanyň mekdep okuwçylaryna, talyp ýaşlaryna, mugallymlaryna hem-de bilim ulgamynyň işgärlerine gutlagy buýsanç bilen okalýar. Döwlet Baştutanymyzyň ýaş nesillere bilimleriň hem-de uly açyşlaryň ýagty ýoluna rowana bolmaklary üçin ak pata bermegi bolsa, bagtyýar nesilleriň kalbyny joşduryp, ruhuny belende göterýär. Şeýlelikde, mukaddes ata Watanymyzda täze okuw ýyly ajaýyp wakalar, arzuwlar we şatlyk-şowhun hem-de uly ynam bilen başlanýar.
Häzirki wagtda, Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň parasatly baştutanlygynda ýurdumyzda bilim ulgamyny döwrebaplaşdyrmak, ösüp gelýän ýaş nesle berilýän bilimiň mazmunynyň we hiliniň öňdebaryjy halkara talaplaryna laýyk gelmegini gazanmak bilim işgärleriniň baş maksady bolup durýar.
Gahryman Arkadagymyzyň «Döwlet adam üçindir!» diýen ynsanperwer şygaryndan ugur alnyp, eziz Diýarymyzyň şäherlerinde we obalarynda häzirki zaman mekdepleriniň hem-de mekdebe çenli çagalar edaralarynyň, ýokary okuw jaýlarynyň yzygiderli gurulýandygy, şolaryň iň döwrebap kompýuterler, beýleki zerur enjamlar we okuw gollanmalary bilen üpjün edilýändigi, okuw işlerine ylmyň öňdebaryjy gazananlarynyň, interaktiw-multimedia hem-de sanly tehnologiýalaryň ornaşdyrylýandygy bu ulgam üçin ýokary derejeli işgärleriň taýýarlanylmagyna, mugallymlaryň hünär derejesiniň ýokarlandyrylmagyna aýratyn üns berilýändigine şaýatlyk edýär.
«Bilimli nesil — kuwwatly Watan» diýilmeginiň aňyrsynda uly many ýatyr. Berkarar ýurdumyzyň ösüşi kuwwaty, bilimli nesil bilen berk baglanyşyklydyr. Ylym-bilim bilen öňe gidip, belent sepgitleri eýeläp bolýar. Garaşsyz, baky Bitarap döwletimiziň röwşen hem bagtly geljegi şu günki ýaş nesilleriň elindedir.
Sanly bilim serişdeleriniň okuw-terbiýeçilik işlerine işjeň ornaşdyrylmagy her bir talybyň öwrenýän derslerini, okuw maksatnamalarynyň talaplaryna laýyklykda, özbaşdak özleşdirmegi üçin amatly şert döredýär. Şeýlelikde, bagtyýar türkmen ýaşlary ýurdumyzda we daşary ýurt döwletlerinde dürli ugurlar boýunça geçirilýän halkara ylmy bäsleşiklerde baýrakly orunlara – medallara we hormat hatlaryna mynasyp bolup, mukaddes ata Watanymyzyň abraý-mertebesini belende göterýärler. Biziň geljekki ösüşlerimiz ýurdumyzyň dowamy bolan şu günki ýaşlarymyzyň bilimlidigine, iş başarjaňlygyna, zähmetsöýerligine, watansöýüjiligine bagly bolup durýar.
Halkara parahatçylyk we ynanyşmak ýylynda, hemişelik Bitaraplygymyzyň şanly 30 ýyllygynyň uludan toýlanylýan ýylynda asuda ýurdumyzda 1-nji sentýabrda agzybirlikde bellenilýän Bilimler we talyp ýaşlar güni biziň ýaş nesillerimizi uly ruhubelentlige besläp, olaryň watansöýüjilik duýgularyny belende göterýär.
Halkyny bagtyýarlykda, eşretli durmuşda ýaşadýan Gahryman Arkadagymyzyň hem-de Arkadagly Gahryman Serdarymyzyň janlarynyň sag, belent başlarynyň aman bolmagyny, beýik işleriniň üstünliklere beslenmegini tüýs ýüregimizden arzuw edýäris!
Bilimler we talyp ýaşlar güni mynasybetli geçirilýän baýramyňyz gutly-mübärek bolsun, mähriban ýaşlar!
Jennet Saparowa,
Türkmenistanda Saýlawlary we sala salşyklary geçirmek boýunça merkezi toparyň edarasynyň Guramaçylyk müdirliginiň baş hünärmeni.