TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR

Şu gün paýtagtymyzyň saýlawçylarynyň Türkmenistanyň Prezidenti wezipesine dalaşgär – “Türkmenhimiýa” döwlet konserniniň “Garabogazsulfat” önümçilik birleşiginiň baş direktory Süleýmannepes Nurnepesow bilen duşuşygy boldy. Duşuşyk “Mekan” köşgünde geçirilip, oňa ýerli häkimiýet edaralarynyň ýolbaşçylary, kärhanalaryň we guramalaryň, köpçülikleýin habar beriş serişdeleriniň wekilleri, hormatly ýaşulular, ýaşlar gatnaşdylar. Şeýle hem duşuşyga 12-nji fewralda Türkmenistanyň Prezidentligine boljak saýlawlara taýýarlyk görlüşiniň barşyna we saýlawlaryň geçişine baha bermek üçin paýtagtymyza gelen Ýewropada Howpsuzlyk we Hyzmatdaşlyk Guramasynyň Demokratik institutlar we adam hukuklary baradaky edarasynyň toparynyň wekilleri gatnaşdylar.

Raýatlaryň teklipçi topary tarapyndan hödürlenen dalaşgäriň ynanylan adamy S.Nurnepesowyň durmuş ýolunyň esasy pursatlary barada gürrüň berip, ony öňde goýlan wezipeleri çözmekde hünär ussatlygy we başarnygy bilen işgärleriň arasynda abraýa we hormata mynasyp bolan tejribeli hem-de guramaçyl ýolbaşçy hökmünde häsiýetlendirdi.

Soňra ýokary döwlet wezipesine dalaşgär bu ýere ýygnananlaryň öňünde saýlawlaryň öňüsyrasyndaky maksatnamasy bilen çykyş etdi. Onuň nygtaýşy ýaly, ykdysadyýetiň her bir pudagyny ösdürmegiň mümkinçiliginiň netijeli we oýlanyşykly peýdalanylmagy, maglumat tehnologiýalarynyň ornaşdyrylmagy, maliýe-bank işiniň kämilleşdirilmegi maksatnamanyň möhüm ugry bolup durýar. Energiýa serişdeleriň eksportunyň köpugurly iberilmegi özüniň ileri tutulýan ähmiýetini saklar. Ilatyň durmuş taýdan goraglylygyna, saglygy goraýyş, bilim, medeniýet, bedenterbiýe we sport ulgamlary üçin döwrebap desgalaryň gurulmagyna, ýaşaýyş jaýlaryň gurluşygyna, ulag-aragatnaşyk düzümleriň ösdürilmegine aýratyn üns berler.

Geljege niýetlenen özgertmeleriň hatarynda himiýa senagatynyň mundan beýläk-de ösdürilmegi bar. Hususan-da, ýurdumyzda tebigy gazyň hem-de gazylyp alynýan beýleki peýdaly baýlyklaryň uly gorlarynyň bolmagynyň azot we kaliý dökünlerini, dürli himiýa önümlerini öndürmek boýunça kuwwatlyklary artdyrmaga giň mümkinçilikleri açýandygy bellenildi. Gün tertibinde, şeýle hem Garabogazköl aýlagynyň suwmineral baýlyklaryny, Balkanyň ýodbromly känlerini, Garlygyň, Garabiliň hem-de Týubegetanyň we türkmen topragynyň beýleki künjekleriniň tebigy baýlyklaryny toplumlaýyn özleşdirmek baradaky mesele boldy.

S.Nurnepesow duşuşyga gatnaşyjylaryň sowallaryna jogap berip, saglygy goraýyş we bilim ulgamlaryny, ulag pudagyny we durmuş ulgamyny, şeýle hem ýaşlaryň işe ýerleşmegini, şäherlerde we günbatar sebitiň obalarynda ýaşaýyş jaý gurluşygyny kämilleşdirmek boýunça meýilnamalary giňişleýin düşündirdi.

Dalaşgäriň nygtaýşy ýaly, Türkmenistanyň döwlet syýasatynyň esasy ugry mikro we makroykdysady işleriň ylmy esasda dolandyrylyşyny guramak arkaly strategik meýilnamalaşdyrmagyň bitewi we çeýe ulgamyny döretmek bolup durýar.

Gyzyklanma bildirip üns berendikleri üçin duşuşyga gatnaşanlara hoşallyk bildirip, S.Nurnepesow bu ýere ýygnananlary özüniň ýokary döwlet wezipesine saýlanan ýagdaýynda ähli güýjüni, bilimini we tejribesini ýurdumyzy mundan beýläk-de yzygiderli ösdürmäge, halkymyzyň hal-ýagdaýyny gowulandyrmaga, mähriban Watanymyzyň halkara derejesinde abraýyny we şöhratyny ýokarlandyrmaga sarp etjekdigine ynandyrdy.