TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR

2025-nji ýylyň 5-nji maýynda Türkmenistanda Saýlawlary we sala salşyklary geçirmek boýunça merkezi toparyň edarasynda Gazagystan Respublikasynyň Türkmenistandaky Adatdan daşary we Doly ygtyýarly ilçisi N. Nogaýew bilen Türkmenistanda Saýlawlary we sala salşyklary geçirmek boýunça merkezi toparyň başlygy G.Myradowyň duşuşygy boldy.

Duşuşyga Gazagystan Respublikasynyň Türkmenistandaky ilçihanasyndan we Türkmenistanyň merkezi saýlaw toparyndan  beýleki degişli adamlar hem gatnaşdylar.

Myhmanlar Türkmenistanyň saýlaw ulgamy, ýurdumyzda Türkmenistanyň Konstitusiýasyna, Türkmenistanyň Saýlaw kodeksine laýyklykda, demokratik esaslarda geçirilýän saýlawlara guramaçylykly taýýarlyk görmek we geçirmek bilen bagly işleri alyp barýan saýlaw toparlary, olaryň döredilişi we ygtyýarlyklary hem-de amala aşyrýan işleri bilen tanyşdyryldy. Mundan başga-da, G.Myradow saýlaw ulgamyndaky halkara gatnaşyklary barada gürrüň bermek bilen, Gazagystan Respublikasynyň Merkezi saýlaw topary bilen saýlaw ulgamynda ysnyşykly, dostlukly gatnaşygyň saklanylýandygyny aýtdy.

Gazagystan Respublikasynyň Türkmenistandaky Adatdan daşary we Doly ygtyýarly ilçisi wagt tapyp kabul edendigi üçin Türkmenistanyň merkezi saýlaw toparynyň başlygyna öz hoşallygyny bildirdi. Diplomat pursatdan peýdalanyp, Gazagystan Respublikasynyň merkezi saýlaw toparynyň başlygy N.Abdirowyň salamyny we şu ýylyň 13-15-nji maýynda Gazagystan Respublikasynda geçiriljek Türki Döwletleriň Guramasyna agza ýurtlaryň merkezi saýlaw edaralarynyň maslahat beriş platformasynyň ilkinji maslahaty we  «Türk dünýäsi: saýlaw ulgamlaryny ösdürmekde däp-dessurlar, tejribe we geljegi» atly halkara ylmy-amaly maslahata çakylygyny ýetirdi. Myhman sözüni dowam edip, «Gazak halky bilen türkmen halkyny medeni-ruhy gymmatlyklaryň umumylygy, taryhyň dowamynda emele gelen dostluk, hoşniýetli goň­şuçylyk gatnaşyklary baglanyşdyrýar. Munuň şeýledigine, şu ýyl Türkmenistanda «Nowruz ýaýlasynda» geçirilen Mil­li ba­har baý­ra­my — Halkara Nowruz güni mynasybetli geçirilen dabaralara gatnaşanymda doly göz ýetirdim» diýip belledi.

G.Myradow duşuşygyň ahyrynda N.Nogaýewe mundan beýläk hem Gazagystan Respublikasynyň merkezi saýlaw topary bilen  Türkmenistanyň merkezi saýlaw toparynyň arasynda ýola goýlan hyzmatdaşlygyň, dostlukly gatnaşyklaryň dowam etdiriljekdigini nygtap, duşuşyga gatnaşandyklary üçin myhmanlara ýene bir gezek öz hoşallygyny bildirdi we işlerinde üstünlik arzuw edip, duşuşygy jemledi.