TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR
Hormatly Prezidentimiz ýurdumyzda adamzadyň parahatçylyk söýüjilik, dost-doganlyk garaýyşlaryny has-da rowaçlandyrýan, ynsanperwerligi we hoşniýetliligi giňden dabaralandyrýan Ýeňiş gününe örän uly ähmiýet berilýändigini aýratyn nygtaýar. Aşgabat şäherindäki «Halk hakydasy» ýadygärlikler toplumy, ähli şäherdir obalarymyzdaky ýadygärlikler munuň şeýledigini doly subut edýär. Bu ýadygärlikler toplumynda ýowuz uruş barada türkmen halkynyň mizemez pikiri beýan edilendir. Çünki, bu urşuň ajy hasratlary, dünýä halklarynyň, şol sanda türkmen halkynyň kalbynda goýan agyr ýatlamalary hiç haçan unudylarly däldir.
1941 — 1945-nji ýyllaryň Beýik Watançylyk urşunda şirin janyny gaýgyrman söweşen köpmilletli esgerleriň arasynda biziň watandaşlarymyz hem edermenlik, gahrymançylyk görkezdiler. Şeýle hem uruş ýyllarynda tylda galan Türkmenistanyň ilaty durmuşa, Watana çäksiz söýgi, ynam duýgulary bilen tutanýerli, gaýratly zähmet çekip, bol galla we pagta ýygnap, şanly Ýeňşiň gazanylmagyna mynasyp goşant goşdular. Watana, il-güne, ojagyna wepaly, zähmetsöýer zenanlarymyz Goranmak gaznasyna altyn-kümüş şaý-sepleriniň 7392 kilogramyny tabşyrdylar. Uruş döwründe gelin-gyzlarymyz «Türkmeniň kalby» atly ägirt uly halyny hem dokamagy başardylar. Bu günki bagtyýar nesillerimiz bolsa, şol merdana watandaşlarymyzyň söweş edermenligi we ak ýürekden çeken zähmeti bilen külli adamzadyň öňünde bitiren beýik işlerine tüýs ýürekden guwanýarlar.
Bu gün Milli Liderimiziň ýolbaşçylygynda Türkmenistan döwletimizde Ýer ýüzünde parahatçylygy pugtalandyrmak, dost-doganlyk gatnaşyklaryny ösdürmek ugrunda ulgamlaýyn işler amala aşyrylýar.
Her ýyl 1941 — 1945-nji ýyllaryň Beýik Watançylyk urşunda gazanylan Ýeňiş mynasybetli uruş weteranlaryna, şeýle hem uruşda wepat bolanlaryň ýanýoldaşlaryna döwletimiz tarapyndan gymmat bahaly sowgatlar dabaraly ýagdaýda gowşurylýar. Diýarymyzda täze gurlan we durky täzelenen dynç alyş öýlerinde, şypahanalarda, hassahanalarda uruş we zähmet weteranlaryna köp sanly durmuş ýeňillikleri döredilýär. Şöhratly nesillere mynasyp hormat goýulýar.