TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR

Hormatly Prezidentimiziň uly aladalary netijesinde, Türkmenistanyň saýlaw ulgamy halkara hukugynyň umumy ykrar edilen kadalaryna laýyklykda, hakyky demokratik ýörelgelere esaslanýar.

Ýurdumyzda käbir saýlaw okruglary boýunça ygtyýarlyk möhletinden öň çykyp giden Türkmenistanyň Mejlisiniň deputatlarynyň, welaýat, etrap, şäher Halk maslahatlarynyň we Geňeşleriň agzalarynyň ýerine 2019-njy ýylyň 31-nji martynda geçiriljek saýlawlara taýýarlyk işleri guramaçylykly dowam edýär.

Mälim bolşy ýaly, Türkmenistanyň Saýlaw kodeksiniň 44-nji maddasyna laýyklykda, 2019-njy ýylyň 30-njy ýanwaryndan bu saýlawlar boýunça dalaşgärleri hödürlemek möwsüminiň başlanýandygy yglan edildi.

Dalaşgärleri hödürlemek işlerine Türkmenistanyň Demokratik partiýasy, Türkmenistanyň Senagatçylar we telekeçiler partiýasy, Türkmenistanyň Agrar partiýasy, şeýle-de degişli saýlaw okruglarynyň çäginde ýaşaýan raýatlar toparlary gatnaşýarlar.

2019-njy ýylyň 13-nji fewraly ýagdaýyna görä, jemlenen maglumatlara laýyklykda, saýlaw okruglarynyň jemi 124-sinde saýlawlar geçiriler, şol sanda: 3-sinde Türkmenistanyň Mejlisiniň deputatlarynyň saýlawlary, saýlaw okruglarynyň 4-sinde welaýat Halk maslahatlarynyň agzalarynyň saýlawlary, saýlaw okruglarynyň 15-sinde etrap, şäher Halk maslahatlarynyň agzalarynyň saýlawlary, saýlaw okruglarynyň 102-sinde bolsa Geňeşleriň agzalarynyň saýlawlary geçiriler.

Häzirki günlerde bu saýlaw okruglary boýunça dalaşgärleri hödürlemek işleri  has-da giň gerime eýe boldy.

Türkmenistanyň Saýlaw kodeksine laýyklykda, dalaşgärleri hödürlemek işleriniň erkinlik we deňhukuklylyk, aýanlyk we açyklyk şertleriniň berjaý edilmegi, şeýle-de saýlaw okruglary boýunça mynasyp dalaşgärleriň hödürlenilmegi üçin ähli mümkinçilikleriň döredilmegi bolsa, bu saýlawlaryň demokratik ýörelgelere esaslanýandygyny görkezýär. 

Dalaşgärleri hödürlemek işleri 2019-njy ýylyň 28-nji fewralyna çenli dowam edýär.

Şeýle-de, 2019-njy ýylyň 13-nji fewraly ýagdaýyna görä jemlenen maglumatlara laýyklykda, saýlawlarda ses bermegi geçirmek üçin saýlaw uçastoklarynyň jemi 220-si döredildi hem-de saýlawlaryň kanunalaýyk geçirilişine syn etmek üçin milli synçylaryň jemi 284-si bellige alyndy.

«Türkmenistan — rowaçlygyň Watany!» diýlip yglan edilen 2019-njy ýylyň mart aýynyň soňky ýekşenbesinde geçiriljek bu saýlawlar boýunça alnyp barylýan taýýarlyk işlerine ser salanyňda, ýurdumyzda demokratiýanyň has-da dabaralanýandygyny görmek bolýar. 

A.Gandymow,

Merkezi saýlaw toparynyň kätibi.