TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR

Türkmenistanyň hormatly Prezidentiniň saýlawlary guramak we geçirmek boýunça dünýä tejribelerini öwrenmek baradaky nesihatlaryna we tabşyrygyna laýyklykda, 2025-nji ýylyň 9-njy iýunynda Türkmenistanda Saýlawlary we sala salşyklary geçirmek boýunça merkezi toparyň başlygynyň orunbasarynyň ýolbaşçylygyndaky wekiliýet Ýewropada Howpsuzlyk we Hyzmatdaşlyk Guramasynyň (ÝHHG) Demokratik institutlar we adam hukuklary baradaky býurosynyň çagyrmagy boýunça Polşa Respublikasynyň Warşawa şäherinde saparda boldy.

Saparyň maksady ÝHHG-niň Demokratik institutlar we adam hukuklary baradaky býurosynyň direktory we wekilleri bilen ikitaraplaýyn duşuşyklary geçirmekden, bu Býuronyň işi bilen tanyşmakdan hem-de hyzmatdaşlygyň geljekki mümkinçiliklerini ara alyp maslahatlaşmakdan ybarat boldy. 

Wekiliýetiň ÝHHG-niň Demokratik institutlar we adam hukuklary baradaky býurosynyň ştab-kwartirasyna guralan saparyna Birleşen Milletler Guramasynyň Ženewadaky edarasynyň ýanyndaky (Şweýsariýa Konfederasiýasy, Ženewa şäheri) Türkmenistanyň hemişelik wekili,  Türkmenistanyň Şweýsariýa Konfederasiýasyndaky (Ženewa şäheri) Adatdan daşary we Doly ygtyýarly ilçisi,  Türkmenistanyň Awstriýa Respublikasyndaky Ilçihanasynyň birinji sekretary, ÝHHG-niň Aşgabatdaky merkeziniň ynsanperwerlik bölüminiň başlygy, Türkmenistanda Saýlawlary we sala salşyklary geçirmek boýunça merkezi toparyň, Türkmenistanyň Daşary işler ministrliginiň, Türkmenistanyň Mejlisiniň, we habar beriş serişdeleriniň wekilleri gatnaşdylar. 

ÝHHG-niň Demokratik institutlar we adam hukuklary baradaky býurosynyň (DIAHB) direktory Mariýa Telalian duşuşygy açyp, çakylygy kabul edip, şu duşuşyga gelendikleri üçin Türkmen wekiliýetine öz hoşallygyny bildirdi. Şeýle hem M. Telalian bu duşuşygyň geljekki hyzmatdaşlygy diolog arkaly ösdürmekde ähmiýetli we täze sahypa boljakdygyna umyt edýändigini aýtdy.

Soňra ÝHHG-niň DIAHB-nyň departamentleriniň wekilleri bilen ikitaraplaýyn duşuşyklar geçirildi.

 Geçirilen duşuşyklaryň dowamynda departamentleriň wekilleri özleriniň alyp barýan işleriniň ugurlary barada çykyş etdiler we bu ugurlar boýunça Türkmenistan bilen geljekki hyzmatdaşlygy ösdürmäge taýýardyklaryny mälim etdiler.

Günüň ahyrynda ÝHHG-niň DIAHB-nyň direktory Mariýa Telalianyň gatnaşmagynda geçirilen duşuşyklaryň netijeleri jemlenildi.

Türkmen tarapy Mariýa Telaliana onuň çakylygy üçin hem-de ikitaraplaýyn hyzmatdaşlygy ösdürmäge ýardam etjek çäräniň guralandygy üçin hoşallygyny bildirdi.