TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR

Ak bugdaý etrabynyň Gämi obasynyň Medeniýet öýünde saýlawçylaryň Türkmenistanyň Prezidentligine dalaşgär—Ahal welaýatynyň ykdysadyýet we ösüş müdirliginiň ýolbaşçysy Serdar Jelilow bilen duşuşygy boldy. Duşuşyga zähmetkeş toparlarynyň, jemgyýetçilik guramalarynyň, köpçülikleýin habar beriş serişdeleriniň wekilleri, hormatly ýaşulular we ýaşlar gatnaşdylar.

Duşuşyga gatnaşanlar teklipçi raýatlar topary tarapyndan hödürlenen dalaşgäriň zähmet ýoly, şahsy we işewür häsiýetleri bilen tanyşdyryldy. S.Jelilowyň ynanylan wekili dalaşgäre abraýly, ak ýürekli hem-de bilimli, oňat guramaçylyk ukyby bolan adam hökmünde häsiýetnama berdi.

Soňra Ahal welaýatynyň saýlawçylarynyň öňünde Türkmenistanyň Prezidenti wezipesine dalaşgäriň özi çykyş etdi. S.Jelilow saýlawlaryň öňüsyrasyndaky maksatnamasynyň esasy bölümlerini beýan edip, döwlet Baştutany wezipesine saýlanylan halatynda durmuş maksatly syýasaty yzygiderli dowam etdirjekdigini, Watana hem-de türkmen halkyna janyny gaýgyrman gulluk etjekdigini belledi. Dalaşgäriň aýdyşy ýaly, ykdysady ösüşiň ýokary depginlerini gazanmak, çig mal serişdelerini rejeli peýdalanmak, hususy telekeçilige we işewürlige goldaw bermek, daşary söwda-ykdysady gatnaşyklary giňeltmek, raýatlaryň durmuş taýdan goragy ýaly meseleler üns merkezinde bolar.

Dalaşgär ýurdumyzda abadançylygy we durnuklylygy saklamaga, obalaryň hem-de şäherleriň abadanlaşdyrylmagyna aýratyn üns bermegi göz öňünde tutýar. Ýokary döwlet wezipesine dalaşgär daşary syýasatda Türkmenistanyň dünýäniň ähli döwletleri bilen dostlukly gatnaşyklary we özara bähbitli hyzmatdaşlygy pugtalandyrmak ýoly bilen hereket etjekdigini nygtady.

S.Jelilow saýlawçylaryň döwletimiziň we jemgyýetimiziň durmuşynyň dürli ugurlaryna degişli sowallaryna jogap berip, ýaşlaryň watançylyk terbiýesi, ýokary derejeli hünärmenleri taýýarlamak bilen baglylykda bilim ulgamyny kämilleşdirmek hem-de ýaş nesli döwlet gurluşy ulgamyna has giňden çekmek meseleleriniň üstünde durup geçdi.

Ulag we aragatnaşyk ulgamynda, milli medeniýeti we halk döredijiligini ösdürmekde işleriň ýagdaýy barada aýratyn gürrüň edildi.

S.Jelilow duşuşygyň ahyrynda ýygnananlara üns berip diňländikleri üçin hoşallyk bildirdi hem-de Garaşsyz, Bitarap Watanymyzyň gülläp ösmegi, türkmen halkynyň abadançylygy we bagtyýarlygy üçin öz gujur-gaýratyny, tejribesini gaýgyrmajakdygyna ynandyrdy.