TÜRKMENISTANDA SAÝLAWLARY
WE SALA SALŞYKLARY GEÇIRMEK
BARADAKY MERKEZI TOPAR

Türkmenistanda Saýlawlary we sala salşyklary geçirmek boýunça merkezi toparyň edarasynda 2022-nji ýylyň 13-nji iýulynda Birleşen Milletler Guramasynyň Saýlawlary geçirmegiň talaplaryna baha bermek boýunça paýtagtymyza gelen wekiliýeti – BMG-niň Syýasy meseleler we saýlawlar boýunça müdirliginiň baş hünärmeni Swetlana Galkina, BMG-niň Saýlawlary geçirmäge ýardam etmek boýunça bölüminiň hünärmeni Weronika Liwsisa, BMG-niň Saýlaw syýasaty boýunça hünärmeni Den Malinowiç bilen duşuşyk boldy. Duşuşyga Merkezi saýlaw toparynyň başlygy Gulmyrat Myradow, şeýle-de Merkezi saýlaw toparynyň edarasynyň wekilleri gatnaşdylar.        

Duşuşygyň barşynda oňa gatnaşyjylar Birleşen Milletler Guramasy bilen Gahryman Arkadagymyz tarapyndan düýbi tutulan, Arkadagly Serdarymyz tarapyndan üstünlikli dowam etdirilýän ikitaraplaýyn we köpýyllyk hyzmatdaşlygyň netijelidigini kanagatlanma bilen bellediler.

Soňra Merkezi saýlaw toparynyň başlygy şeýle diýdi: «Biziň döwletimiz Birleşen Milletler Guramasy bilen köpugurly gatnaşyklary ösdürmäge aýratyn ähmiýet berýär». Şol gatnaşyklar soňky ýyllarda täze mazmuna eýe bolýar.   Munuň şeýledigine Türkmenistanyň BMG-niň Baş Assambleýasynyň 77-nji sessiýasynyň başlygynyň orunbasarlygyna biragyzdan saýlanandygy hem şaýatlyk edýär.

Duşuşykda myhmanlara ýurdumyzda milli ykdysadyýetimiziň ähli pudaklaryna sanly tehnologiýalaryň ornaşdyrylyşy, şonuň bilen birlikde Türkmenistanda Saýlawlary we sala salşyklary geçirmek boýunça merkezi toparyň edarasynda, şeýle hem degişli saýlaw toparlarynda sanly ulgamyň mümkinçiliklerinden peýdalanmak boýunça amala aşyrylýan işler barada giňişleýin gürrüň berildi.

Duşuşugyň dowamynda BMG-niň Syýasy meseleler we saýlawlar boýunça müdirliginiň baş hünärmeni Swetlana Galkina söz berildi. Ol myhmansöýerlik  bile garşylanandygy üçin hoşallyk bildirdi. Saparyň esasy maksadynyň Türkmenistanda saýlawlary geçirmekde Birleşen Milletler Guramasy tarapyndan ýardam bermegiň mümkinçiliklerini kesgitlemekdigini belledi. Şeýle-de, 2022-nji ýylyň 18-nji iýulyna çenli  dowam etjek wekiliýetiň saparynyň maksatnamasynyň çäklerinde Türkmenistanyň Milli Geňeşiniň Mejlisinde, Türkmenistanyň Döwlet, hukuk we demokratiýa institutynda, Türkmenistanyň Adalatçysynyň diwanynda, Türkmenistanyň Içeri işler ministrliginde, «Türkmenaragatnaşyk» agentliginde, Türkmenistanyň Telewideniýe, radiogepleşikler we kinematografiýa baradaky döwlet komitetinde, Türkmenistanyň syýasy partiýalarynda we jemgyýetçilik guramalarynda hem şular ýaly duşuşyklaryň geçirilmeginiň göz öňünde tutulýandygyny aýtdy.

Merkezi saýlaw toparynyň edarasynda geçirilen duşuşyga gatnaşyjylar ýurdumyzda geljekde saýlawlaryň demokratik ýörelgeler esasynda geçirilmeginde peýdaly boljak şular ýaly duşuşyk-maslahaty geçirmäge döredip beren mümkinçilikleri üçin hormatly Prezidentimize hoşallyklaryny aýtdylar.